Maske za kosu koje morate isprobati ove zime

Svake zime isti problem – hladno vrijeme i grijanje čine da vaša kosa bude bez sjaja i sklona lomljenju. Vjerovali ili ne, rješenje se nalazi u kuhinji! Poslušajte naše savjete, napravite jednostavne maske i bićete ponosne na svoju frizuru!

Njega kose zimi može da bude i te kako veliki problem, ali ne očajavajte prije vremena, mi imamo rješenje za vas. Zavirite u kuhinju, sigurni smo da imate sastojke koji su vam potrebni kako biste napravile prirodne maske za kosu i nahranile svoju beživotnu kosu. Garantujemo da će vam mnogi zavidjeti ove zime.

Avokado i med za „naelektrisanu“ kosu

Ukoliko i vas izluđuje kada vam se kosa lijepi za lice i usne, trk u kuhinju. Pomiješajte meso avokada sa jednom kašikom meda i dvije kašike maslinovog ulja. Dobro promiješajte i utrljajte u kosu. Ostavite da odstoji pola sata, a zatim isperite šamponom. Ukoliko budete praktikovale ovu masku svakih nekoliko sedmica, naelektrisana kosa biće prošlost za vas, a pritom ćete je i ojačati i hidrirati.

Banane i med za kosu bez sjaja

Ako vam je potrebna brza njega kojom ćete povratiti sjaj svojoj kosi, onda je ovaj recept savršen za vas. Pomiješajte dvije zrele banane, dvije kašičice meda i pola šoljice mlijeka. Dobro promiješajte i ravnomjerno nanesite na čistu kosu. Ostavite da odstoji 20 minuta, pa isperite šamponom. Kosa će vam zasijati za tren.

Majonez i med za suhu kosu

Iako vam ova maska možda na prvi pogled bude djelovala čudno, ipak će vam pomoći da se izborite sa zimskim isušivanjem vlasi i povratite mekoću kosi. Vrlo je važno da je ne koristite više od jednom sedmično, jer ćete u suprotnom završiti sa masnom kosom. Pomiješajte pola šolje majoneza sa dvije kašičice meda, utrljajte u kosu i ostavite da odstoji oko pola sata. Isperite šamponom i zaboravite na regenerator!

Bademi i banana za suhu kosu bez sjaja

Ovo je jedna od najjednostavnijih maski koje možete napraviti, a sastojke sigurno imate u kuhinji. Izmiksirajte jednu zrelu bananu i dodajte 1-3 kapi bademovog ulja. Nanesite na kosu i ostavite da djeluje 15 minuta. Na kraju je isperite mineralnom vodom kako biste povećali efekat maske. Dobićete sjajnu, meku kosu, bez naelektrisanja.

Ovsena kaša i mlijeko za oštećenu kosu

Ukoliko je zima već uništila vašu kosu, nemojte da očajavate, tu je maska i za vas. Možda će vam biti malo teže da je primijenite, jer je gušća od ostalih, ali ne odustajte. Pomiješajte jednu kašiku ovsene kaše, jednu kašiku mlijeka i jednu kašiku bademovog ulja. Ukoliko imate prirodno masniju kosu, onda u smjesu stavite samo pola kašike bademovog ulja. Nanesite i ostavite da djeluje 20 minuta, pa isperite regularno šamponom. Vidjećete kako će vaša kosa oživjeti za tili čas.

Banana i majonez za kosu bez sjaja

Ništa ne može da da tako dobar efekat vašoj kosi, kao što može maska od majoneza i banana. Pomiješajte ih i dobićete izgled filmske zvijezde. I ne samo to, bićete oduševljeni mekoćom koju će pružiti vašoj kosi. Dakle, izmiksirajte dvije zrele banane, jednu kašiku maslinovog ulja i tri kašike majoneza. Nanesite na čistu kosu i ostavite 30 minuta, pa isperite uobičajeno šamponom.

Avokado i majonez za suho tjeme glave

Ponekad tokom zime tjeme glave umije toliko da se osuši da se koža bukvalno u pečatima ljuspa, a tu je i neprijatan svrab glave. Ova maska ne samo da će hidrirati vašu kosu, već će umiriti svrab i srediti suhoću tjemena. Pomiješajte jedan zreli avokado sa jednom kašikom majoneza, nanesite na tjeme glave i ostavite da djeluje 20-30 minuta, pa potom isperite. Vjerujte nam da će vam vaša glava i kosa biti zahvalne.

Jaja i med za slabu kosu bez sjaja

Ojačajte kosu, dodajte joj sjaja i spriječite neprijatno naelektrisanje kose tako što ćete smućkati ovu masku. Lako se pravi, još lakše nanosi, a efekat je savršen. Izmućkajte jedno srednje ili veliko jaje sa trećinom šoljice meda i tri kašike maslinovog ulja. Nanesite ravnomjerno na kosu i ostavite da djeluje pola sata, a zatim isperite šamponom.

Ukoliko imate dugu kosu možda ćete morati da udvostručite sastojke kako biste pokrili cijelu površinu. Naš savjet je da isprobate sve ove maske kako biste vidjele koja vam najviše odgovara, a onda je praktikujte jednom sedmično i recite zbogom suvoj kosi bez sjaja!

I ne zaboravite da nam napišete u komentarima koja je vaša omiljena maska!

Izvor: Life Content